MUGIren erabilerak nabarmen gora egin du 2025ean, 82 milioi bidaia ingururekin, 2024ko errekorra baino 6 milioi gehiago

• Azahara Domínguez Gipuzkoako Garraioaren Lurralde Agintaritzaren presidente eta Mugikortasuneko, Turismoko eta Lurralde Antolaketako diputatuak jakinarazi duenez, iaz 92,1 milioi bidaia egin ziren MUGI sistema osatzen duten garraioetan, eta hamar bidaiatik ia bederatzi (%86) txartel horrekin ordaindu ziren.

• Gainera, 170.000 txartel berri baino gehiago egin ziren (aurreko urtean baino ia 18.000 gehiago), eta, lehen aldiz, 2013an, MUGI sistema merkaturatu zen urtean, egindako txartelen kopurua gainditu zen.

• Azahara Domínguez, Gipuzkoako Garraioaren Lurralde Agintaritzaren presidente eta Mugikortasuneko, Turismoko eta Lurralde Antolaketako diputatua: “Nazioarteko ziurgabetasun handiko testuinguru honetan, MUGIk segurtasuna eta lasaitasuna ematen dizkie milaka familiari; izan ere, ez dute egunero erregaiaren prezioa begiratu behar, badakitelako Gipuzkoan konfiantza handieneko garraio publiko sistema jasangarri eta integratua dutela, beren beharretara eta egoera pertsonalera egokitzen dena, zenbat eta gehiago erabili orduan eta deskontu handiagoak eskaintzen dituena, abantaila ugarirekin batera, eta garraio publikoaren sarbidea demokratizatu duena. Horregatik, gure helburua sistema hau hedatzen jarraitzea da, operadore berriak eta deskontu handiagoak txertatuz”.

Donostia, 2026eko martxoaren 5a.- MUGIren erabilerak goranzko joerari eusten dio Gipuzkoan. 2025ean, txartel honen erabilerak ia 82 milioi bidaia izan ditu, 2024an ezarritako errekorrarekin alderatuta sei milioi bidaia gehiago. MUGIn integratuta dauden garraio publikoko operadoreek (Lurraldebus, Euskotren, Renfe Aldiriak, Donostia, Irun, Errenteria, Arrasate, Zarautz, Eibar, Hernani, Lasarte, Oiartzun, Oñati eta Tolosako hiri-autobusak eta Pasaiako txalupa) erregistratutako 92,1 milioi bidaietatik 81,9 milioi MUGIrekin ordaindu dira; horrek esan nahi du garraio publikoko bidaien %86 txartel honekin ordaindu direla.

Datu hauek ostegun honetan eman ditu ezagutzera Gipuzkoako Garraioaren Lurralde Agintaritzako presidente eta Mugikortasuneko, Turismoko eta Lurralde Antolaketako diputatu Azahara Domínguezek. Lurraldeko garraio publikoan izaten ari diren “datu bikainak” nabarmendu ditu. “Gipuzkoan badugu garraio publikoa sustatzeko sistema aitzindari bat, MUGI, eta gainera erreferentea da beste lurralde askorentzat, baita Euskadin ere. Horregatik, albiste bikaina da egiaztatzea Gipuzkoan duen hedapena etengabe hazten ari dela eta gero eta pertsona gehiagok goza ditzaketela haren abantaila guztiak: erabileraren araberako deskontu progresiboak, operadoreen arteko doako transbordoak, adingabeentzat eta mendekotasuna duten pertsonen laguntzaileentzat doakotasuna, besteak beste”, adierazi du Azahara Domínguezek.

• Azahara Domínguez Gipuzkoako Garraioaren Lurralde Agintaritzaren (GGLA) presidenteak jakinarazi duenez, ostiral honetan egindako ezohiko batzarrean onartu da Gipuzkoa Espainiako Gobernuaren Errege Dekretuak jasotzen dituen deskontuei atxikitzea; beraz, 2026an adingabeek doan bidaiatzen jarraituko dute 15 urte bete arte; 15 eta 25 urte bitartean garraio publikoaz gozatzen jarraituko dute % 50ean, eta gainerako erabiltzaileek % 40ko hobariak izango dituzte.

• Azahara Domínguez, GGLAko presidentea: "Gipuzkoan beti defendatu dugu prezio eskuragarriak dituen garraio publiko baten aldeko apustua egitea, beste neurri batzuez gain, funtsezkoa dela pertsona guztiek mugikortasun iraunkorrago baterako eskubidea izan dezaten, bizitza non bizi den eta zein errenta duten kontuan hartu gabe garatu ahal izateko. Horregatik, albiste bikaina da 2026an MUGI sistemaren abantaila guztiak indarrean dauden deskontuekin osatzea".

Donostia, 2025eko abenduaren 26a.- Gipuzkoak gaur egun garraio publikoan indarrean dauden deskontuez gozatzen jarraituko du 2026an. Horrela iragarri du ostiral honetan Gipuzkoako Garraioaren Lurralde Agintaritzako presidenteak, Azahara Domínguezek, eta jakinarazi du ezohiko batzarrak deskontuak 2026an mantentzea onartu duela, Espainiako Gobernuak garraio publikorako laguntzei eusten diela jakin ondoren.

Donostia, 2025eko abenduaren 22a.– Gipuzkoako Garraioaren Lurralde Agintaritzaren (GGLA) batzarrak, Azahara Domínguez presidentea buru dela, Andoain eta Hondarribiako udalak MUGI sisteman integratzea onartu du. Erabaki horri esker, lurraldeko garraio publiko integratuaren sarea zabalduko da, eta herritarrei mugikortasun jasangarriagoa, erosoagoa eta irisgarriagoa eskainiko zaie.

Andoainen kasuan, udalbatzak GGLAko kide izateko beharrezko baldintzak onartu ondoren, batzarrak hiri-autobusaren integrazioari baiezkoa eman dio eta bi aldeak juridikoki lotzen dituen hitzarmena sinatu da. Integrazioa eraginkorra izan dadin, Udalak MUGIrekin balidatzeko makinak prest izatea besterik ez da falta, herritarrek sistemaren abantaila guztiez baliatu ahal izateko.

Bestalde, Hondarribiaren integrazioa ere GGLAko batzarrak onartu du, eta eraginkorra izango da Udalak hiri-autobus zerbitzua martxan jarri eta MUGI txartelak erabiltzeko balidagailuak prest dituenean. Integrazio horri esker, zerbitzu berria hasieratik bertatik Gipuzkoako mugikortasun sarean txertatuko da, txartel bakarra eta tarifa-sistema bateratua erabiliz.

Azahara Domínguez GGLAko presidenteak ospatu du ostegun honetatik aurrera Bizkaiko garraio publikoan MUGIrekin ordaindu ahal izatea

• Azahara Domínguez, GGLAko presidentea: “Albiste bikain baten aurrean gaude; izan ere, horrela garraio publikoko zerbitzu askoz erosoago baterantz goaz, kasu honetan gipuzkoarrentzat eta erosotasuna funtsezkoa da herritarren joan-etorrietan garraio publikoaren aldeko gero eta apustu handiagoa egiteko. Gipuzkoatik MUGI sisteman sakontzen jarraituko dugu bere eskubideen zorroa handitzeko eta herritarrei gero eta zerbitzu hurbilago, erosoago eta modernoagoa eskaintzeko”.

Donostia, 2025eko abenduaren 18a.- Azahara Domínguez GGLAko presidenteak ospatu egin du ostegun honetatik aurrera MUGIko erabiltzaileek txartel horrekin ordaindu ahal izatea Bizkaiko garraio publiko osoan, beste txartelik erosi behar izan gabe.

Horrela, gaurtik aurrera, Bilbobus, Bizkaibus, Etxebarri Bus, Erandio Bus, Kbus, Leioa Bus, Galdabusa, Sopelbus, Galdakaoko anezka, Artxandako funikularra, Bizkaiko Zubia eta Asensor Ereaga zerbitzuek bat egingo dute Bilboko eta Gasteizko tranbiekin, Gasteizko hiri-autobusekin, Arabako hiriartekoarekin, Metro Bilbaorekin eta Larreinetako funikularrarekin.

MUGIren erabilera Gipuzkoatik kanpo zabaltze horri gehitu behar zaio 2025eko abenduaren 16an emandako beste urrats bat; orduan, Barik (Bizkaia) eta BAT (Araba) txartelak Lurraldebus sarean onartuak izatera pasa baitziren, Arabako eta Bizkaiko pertsonek Gipuzkoatik eroso bidaiatu ahal izatea erraztuz.

Aurrerapen horiek euskal erakundeen arteko lankidetzaren emaitza dira, eta helburu komun bati erantzuten diote: bidaiarien konektibitatea eta esperientzia hobetzea, lurraldeen arteko garraio publikoaren erabilera errazagoa, erosoagoa eta eskuragarriagoa eginez.

Gipuzkoako Garraioaren Lurralde Agintaritzak (GGLA) MUGI birtualaren proba pilotua hasiko du aste honetan Muittu Manttangorri zerbitzuan, Lasarte-Oriako hiri-autobusean. GGLAko presidente Azahara Domínguezek azaldu duenez, zerbitzu honetan balidagailu berriak instalatu dira dagoeneko, eta, beraz, proba teknikoak arrakastaz amaitu ondoren, aste gutxiren buruan MUGI birtuala erabili ahal izango da autobus honetan.

MUGI birtuala martxan jarri aurreko fase giltzarria da hau, behin betiko ezarpena egin aurretik sor daitezkeen gorabeherak atzeman eta konpontzeko balioko duena. Probak ostegunean hasiko dira, abenduaren 18an, eta Lasarte-Oria ordainketa sistema berri hau probatzen duten lehen udalerrietako bat izango da.

“MUGI birtuala ezartzea mugarri garrantzitsua izango da Gipuzkoako garraio publikoaren modernizazioan, eta zerbitzu arinagoa, erosoagoa, modernoagoa eta iraunkorragoa eskaintzea ahalbidetuko digu, txartel fisikoetarako erabiltzen den plastikoa murriztuko baita”, adierazi du GGLAko presidenteak.

• Azahara Domínguez presidenteak jakinarazi duenez, batzarrak ontzat eman du Udalak sistema horretan sartzeko egindako eskaera. Hori eraginkorra izan dadin, Udalak, lehenik eta behin, udal guztiek GGLAko kide izateko dituzten baldintzak onartzen dituela berretsi beharko du Udalbatzan, eta, ondoren, Batzarrak integrazio hori behin betiko onartuko du.

• Azahara Domínguez, GGLAko presidente eta Mugikortasuneko, Turismoko eta Lurralde Antolaketako diputatua: "Gipuzkoako garraio publikoa ezin da ulertu MUGI sistemarik gabe. Horregatik, funtsezkoa da operadore berriak sareratzen joatea, gipuzkoar gehiagok sistema honen onura guztiak izan ditzaten”.