Gipuzkoako Garraioaren Lurralde Agintaritzak eta Aizarnazabalgo Udalak akordioa lortu dute MUGI txartelen izapideak udaletxean egiteko aukera emateko
- Gipuzkoako Garraioaren Lurralde Agintaritzako presidente Azahara Domínguezek adierazi duenez, hilaren 26an, astelehenean, nahi duten herritarrek MUGI txartelak eskuratu eta kargatu ahal izango dituzte udaletxean.
- Gehikuntza berri horrek MUGI txartelak eskatu eta kargatzeko puntuen sarea zabaltzen du. Sare horretan daude dagoeneko Ataun, Albiztur, Beizama, Urretxu eta Hernialdeko udalak, baita lurraldeko hogei bat turismo-bulego eta baliabide turistiko ere, joan den udaberriaz geroztik zerbitzu hori eskaintzen dutenak. Horiez gain, beste hamabost udaletan ere egin daitezke izapide horiek.
- Azahara Domínguez, Mugikortasuneko, Turismoko eta Lurralde Antolaketako diputatua eta GGLAko presidentea: “Aurrez aurreko arreta indartzeko eta zerbitzuak herritarrengana hurbiltzeko apustua sendotu nahi dugu. Horretarako, gure lehentasunen artean dago MUGI txartel berriak eskuratzea erraztea eta erabiltzaileek beren izapideak modu eroso eta arinean, etxetik gertu, egin ahal izatea”.
- Unai Alberdi, Aizarnazabalgo alkateordea: “Zerbitzu berri hau ematea garraio publikoa erabiltzen duten Aizarnazabalgo herritarrentzat aurrerapauso bat izango delakoan gaude, bereziki aurrez aurreko arreta eta zerbitzua hobesten dutenentzat”.
Aizarnazabal, 2026ko urriaren 21a.-Aizarnazabalgo Udalak datorren astelehenetik, hilaren 26tik, aurrera MUGI txartelak eskatzeko eta kargatzeko aukera eskainiko du bere instalazioetan. Neurri horri esker, erabiltzaileek udalerrian bertan egin ahal izango dituzte izapide horiek, beste herri batzuetara joan beharrik gabe. Ekimen hau Gipuzkoako Garraioaren Lurralde Agintaritzak (GGLA) sustatutako aurrez aurreko arreta-sarea zabaltzeko planaren barruan kokatzen da.
GGLAko presidente Azahara Domínguezek eman du zerbitzu berri honen berri. Ekimenaren helburua da “MUGI txartelarekin lotutako izapideak herritarrengana hurbiltzea eta garraio publikoa erabiltzeko aukera erraztea, bereziki udalerri txikietan”.
Arreta-puntu hau martxan jartzea posible izan da GGLAren eta udalaren arteko lankidetzari esker. Prozesu horren barruan, udal-langileek berariazko prestakuntza jaso dute txartelen eskaerak eta kargak behar bezala kudeatzeko.
Azahara Domínguezek nabarmendu du “garrantzitsua dela mota honetako zerbitzuak Gipuzkoa osora zabaltzea”, eta eskerrak eman dizkio Aizarnazabalgo Udalari, garraio publiko bidezko mugikortasuna sustatzeko erakutsitako lankidetza eta konpromisoagatik. Ildo horretan, adierazi duenez, “izapide hauek udalerrietara hurbiltzeak joan-etorriak murriztea ahalbidetzen du, eta herritarrei MUGI txartela modu errazago eta eskuragarriagoan izapidetzen eta erabiltzen laguntzen die”.
Aizarnazabal sarean sartzea GGLA garatzen ari den “MUGI arreta-sarea zabaltzeko planaren” barruan kokatzen da, lurralde osoan zerbitzuen estaldura handitzeko helburuarekin. “Duela hilabete batzuk, Gipuzkoako udalekin harremanetan jarri ginen ekimen honekin bat egiteko aukera eskaintzeko, eta sareak pixkanaka zabaltzen jarraitzen du”, azaldu du.
Joan den udaberriaz geroztik, MUGI txartelak eskatu eta kargatu daitezke Ataun, Albiztur, Beizama, Urretxu eta Hernialdeko udaletxeetan, baita Gipuzkoan banatutako hogei bat turismo-bulego eta informazio-puntutan ere. Establezimendu horiek lehendik zegoen arreta-sarea zabaltzen dute; izan ere, dagoeneko hamabost bat udaletxetan egin daitezke izapide horiek.
“Aurrez aurreko arreta indartzeko eta zerbitzuak herritarrengana hurbiltzeko apustua sendotu nahi dugu. Horretarako, gure lehentasunen artean dago MUGI txartel berriak eskuratzea erraztea eta erabiltzaileek beren izapideak modu eroso eta arinean, etxetik gertu, egin ahal izatea”, adierazi du Azahara Domínguezek.
Bestalde, Unai Alberdi, Aizarnazabalgo alkateordeak, honako hau esan du: “Zerbitzu berri hau ematea garraio publikoa erabiltzen duten Aizarnazabalgo herritarrentzat aurrerapauso bat izango delakoan gaude, bereziki aurrez aurreko arreta eta zerbitzua hobesten dutenentzat”.