Azahara Domínguez GGLAko presidenteak Multiverse Computing bisitatu du, garraio publikoaren erabiltzaileentzako arreta hobetzeko proiektu aitzindari bat garatzen ari direnekin
• Garraio publikoa erabiltzen duten pertsonen esperientzia hobetzeko adimen artifiziala aplikatuko duen ekimen hau Londresen aurkeztuko da, London Ticketing Global garraio publikoan ordainketa eta ticketing sistemei buruzko Europako topaketa garrantzitsuenetako baten esparruan.
• Azahara Domínguez, Gipuzkoako Garraio Lurralde Agintaritzaren presidenta: “Garraio publiko irisgarriago, eraginkorrago, jasangarriago eta XXI. mendera egokituago baterantz aurrera egin nahi dugu, eta, horretarako, berrikuntza teknologikoan laguntzen ari gara, eskaintzen dugun zerbitzua hobetzeko eta, horrela, garraio publikoaren erabilera sustatzeko. Zorte handia da Gipuzkoan Multiverse Computing bezalako munduko erreferentziazko enpresa bat izatea, tresna abangoardistenetan oinarritzeaz gain, egiten duen guztian iraunkortasunaren prisma hain presente duena. Eta eskertzekoa da nazioartean proiekzio izugarria duen enpresa batek, Gipuzkoan punta-puntako proiektuetan parte hartzea, lurraldea modernizatzen ez ezik, herritarrei eskaintzen zaien zerbitzu publikoa hobetzen ere lagunduz, kasu honetan, garraio publikoan”.
• Ane Oyarbide, Donostiako udaleko Berdintasunako, Ekonomia eta Tokiko Enpleguko zinegotzia: “Proiektu hau berrikuntza publikoaren adibide garbia da, non erakundeak enpresa teknologikoekin elkarlanean aritzen diren herritarren zerbitzuak eta eguneroko bizitza hobetzen dituzten irtenbide berriak garatzeko. Donostian zientziaren eta berrikuntzaren arloan punta-puntako enpresak ditugu, hala nola Multiverse Computing, hirirako eta lurralderako aberastasuna eta hazkundea sortzeaz gain, gizartean benetako eragina duten proiektuak bultzatzen dituztenak, pertsonen egunerokotasuna hobetzen eta errazten lagunduz. Horregatik, funtsezkoa da lankidetza hori indartzen jarraitzea eta hiri gisa berrikuntzaren aldeko apustu estrategikoari eustea”.
• Enrique Lizaso, Multiverse Computing enpresaren sortzaileetako bat eta CEO-a: “Multiverse Computing-en uste dugu adimen artifizialak funtsezko papera bete dezakeela zerbitzu publikoak hobetzeko, hala nola garraioa. Proiektu honek, Gipuzkoako Garraioaren Lurralde Agintaritzarekin batera, argi erakusten du nola lagundu dezakeen teknologiak informaziorako sarbidea errazten, erabiltzaileen esperientzia hobetzen eta herritarrei benetako beharrak hobeto ulertzeko tresnak ematen”.
Donostia, 2026eko martxoaren 13a.- Azahara Domínguez Gipuzkoako Garraioaren Lurralde Agintaritzaren (GGLA) presidenteak Donostian errotuta dagoen Multiverse Computing enpresa teknologikoaren instalazioak bisitatu ditu, Gipuzkoan garraio publikoaren erabiltzaileei arreta hobea emateko bi erakundeak garatzen ari diren proiektu bateratuaren aurrerapenak bertatik bertara ezagutzeko.
Ane Oyarbide Donostiako Udaleko Berdintasun, Ekonomia eta Tokiko Enpleguko zinegotziak ere parte hartu du bisitan. Multiverse Computing enpresak Sustapen Sozietatearen Emakumeekinn saria jaso berri du, eta agintariek ekimen horren garapenean sakontzeko aukera izan dute. Proiektu honetan adimen artifiziala erabiliko da garraio-sistemaren informazioa errazago eskuratzeko eta MUGI sistemaren erabiltzaileen esperientzia hobetzeko.
Jakinarazi duenez, proiektu hau martxoaren 17an eta 18an aurkeztuko dute nazioartean, Londresen, London Ticketing Global egitasmoaren baitan, garraio publikoaren ordainketa eta ticketing sistemei buruzko Europako topaketa nagusietako batean.
Garraio publikoaren erabiltzaileentzako arreta hobetzea
GGLAk Multiverse Computing-ekin batera garatzen ari den proiektuaren helburua herritarrek garraio publikoari buruzko informazioa nola eskuratuko duten hobetzea da.
"Urtero, MUGI sistemak milioika bidaia eta tarifekin, txartelekin, ibilbideekin edo gorabeherekin lotutako milaka kontsulta kudeatzen ditu. Kudeaketa horiek errazteko, tresna digital berriak garatzen ari dira, erabiltzaileen galderei azkarrago eta errazago erantzuteko hainbat kanalen bidez, hala nola webgunearen, aplikazioaren edo mezularitza-zerbitzuen bidez", azaldu du Azahara Domínguezek.
"Tresna horiek adimen artifiziala erabiliko dute herritarren kontsultak hobeto ulertzeko eta segundo gutxitan erantzun argiak eskaintzeko, itxaronaldiak murriztuz eta garraio publikoaren informaziorako sarbidea erraztuz", gaineratu du.
"Zorte handia da Gipuzkoan Multiverse Computing bezalako munduko erreferentziazko enpresa bat izatea, tresna abangoardistenetan oinarritzeaz gain, egiten duen guztian iraunkortasunaren prisma hain presente duena", adierazi du Azahara Domínguezek, eta eskertu egin du "nazioartean proiekzio izugarria duen enpresa batek Gipuzkoan puntako proiektuetan parte hartzea, lurraldea modernizatzen ez ezik, herritarrei eskaintzen zaien zerbitzu publikoa hobetzen ere lagunduz, kasu honetan, garraio publikoan".
Bestalde, Ane Oyarbidek nabarmendu duenez, "berrikuntza publikoaren adibide argia da, non erakundeak enpresa teknologikoekin elkarlanean aritzen diren herritarren zerbitzuak eta eguneroko bizitza hobetzen dituzten irtenbide berriak garatzeko. Donostian zientziaren eta berrikuntzaren arloan punta-puntako enpresak ditugu, hala nola Multiverse Computing, hirirako eta lurralderako aberastasuna eta hazkundea sortzeaz gain, gizartean benetako eragina duten proiektuak bultzatzen dituztenak, pertsonen egunerokotasuna hobetzen eta errazten lagunduz. Horregatik, funtsezkoa da lankidetza hori indartzen jarraitzea eta berrikuntzaren aldeko apustu estrategiko horri eustea hiri gisa".
Azkenik, Enrique Lizasok, Multiverse Computing enpresaren sortzaileetako bat eta CEOak, honako hau baloratu du: "Adimen artifiziala funtsezkoa izan daiteke zerbitzu publikoak hobetzeko, hala nola garraioa. Proiektu honek, Gipuzkoako Garraioaren Lurralde Agintaritzarekin batera, argi erakusten du nola lagundu dezakeen teknologiak informaziorako sarbidea errazten, erabiltzaileen esperientzia hobetzen eta herritarrei benetako beharrak hobeto ulertzeko tresnak ematen".
Garraio publiko irisgarriagoa, eraginkorragoa eta iraunkorragoa
Erabiltzaileei ematen zaien arreta hobetzeaz gain, proiektu honek aukera emango du herritarren kontsultek sortzen duten informazioa modu eraginkorragoan aztertzeko. "Horrek arazo errepikatuak detektatzen, zerbitzuen diseinua hobetzen eta sistema herritarren benetako beharretara hobeto egokitzen lagunduko du", adierazi du GGLAko presidenteak.
Ekimena Garraioaren Lurralde Agintaritzak MUGI sistema modernizatzeko duen estrategiaren barruan kokatzen da. "Garraio publiko irisgarriago, efizienteago, jasangarriago eta XXI. mendera egokituago baterantz aurrera egin nahi dugu, eta, horretarako, berrikuntza teknologikoan laguntzen ari gara, ematen dugun zerbitzua hobetzeko eta, horrela, garraio publikoaren erabilera sustatzeko", adierazi du Azahara Domínguezek, eta "Gipuzkoako enpresa-sarearen eta erakundeen arteko lankidetzaren" alde egin du, "herritarren zerbitzura egongo diren tresnak garatzeko".
London Ticketing Globalen parte hartzeak, gainera, aukera emango du esperientzia hau mundu osoko garraio eragile eta agintariekin partekatzeko eta Gipuzkoako mugikortasun sistema hobetzen lagunduko duten soluzio berriak ezagutzeko.