Donostia Zinemaldiak eta GGLAk mugikortasun jasangarria bultzatzeko aliantza indartu dute

73. edizioan, Zinemaldia eta Gipuzkoako Garraioaren Lurralde Agintaritza (ATTG-GGLA) lankidetzan ariko dira, stand batekin Kursaalen eta escape room tematiko batekin Okendo Plazan

Bigarren urtez jarraian, Donostia Zinemaldiak eta Gipuzkoako Garraioaren Lurralde Agintaritzak (GGLA) indarrak batu dituzte, Gipuzkoako hiriburuko zinema-ekitaldi handiak iraungo duen egunetan garraio publikoaren erabilera eta jasangarritasuna sustatzeko. Bi erakundeen arteko lankidetza horrek Zinemaldiaren karbono-aztarna murrizteko duten konpromisoa indartzen du; gainera, Mugikortasunaren Astearen aldi berean gertatuko da.

Zinemaldia 2020an hasi zen ekitaldi jasangarriago baterako trantsizioa egiten, eta, murriztearen, birziklatzearen eta berrerabiltzearen arloan lehen urratsak eman ondoren, 73. edizio honetan berriro ere mugikortasun jasangarrian jarri du arreta, kontuan izanik horrelako ekitaldi batek guztira sortutako emisioen % 40 inguru mugikortasunari dagokiola.

Standa Kursaalen

Gipuzkoako Garraioaren Lurralde Agintaritzak gune bat prestatuko du berriz Kursaalen (balio anitzekoentzako halla, beheko solairua); Donostiako –eta are gehiago, lurralde osoko– garraio publikoaren sistemari buruzko informazioa lortu ahalko da gune hartan, Mugi txartela erosi eta kargatzeaz gainera.

Azahara Domínguez GGLAko presidenteak azaldu duenez, "arretagune honekin, Zinemaldiko akreditazioa duten pertsona guztiei Donostian eta Gipuzkoan mugitzeko modurik onena ezagutzera eman nahi zaie, azokaren egunetan garraio publikoaren sarerako sarbide eroso, jasangarri eta efizientea ahalbidetuz". Ildo horretan, iaz standaren harrera "bikaina" izan zela gogorarazi du, eta "300 pertsona baino gehiago hurbildu ziren informazio-postu horretara, nola MUGI txartelaren inguruko izapideak egiteko, hala garraio publikoari buruzko informazioa lortzeko".

Zerbitzua irailaren 19tik 23ra egongo da eskuragarri 9:30etik 17:30era eta irailaren 24tik 25era 9:30etik 13:30era.

Escape rooma Okendo plazan

Gainera, aurtengo berrikuntza gisa, ikus-entzuleek Okendo plazan egingo den escape room tematiko batean parte hartu ahalko dute, non zinema eta garraio publikoa izango diren protagonista. Jarduera arratsaldez egongo da zabalik astelehenetik ostiralera, eta goizez eta arratsaldez, berriz, asteburuetan, eta esperientzia dibertigarria, ludikoa eta doakoa eskainiko du, herritarrak mugikortasun jasangarriaren balioetan inplikatze aldera.

"Modu atsegin eta sortzailean hurbildu nahi dugu mezu bat: garraio publikoa dela, hain zuzen, Donostian eta Gipuzkoan gozatzeko modurik onena azokaren egunetan eta urtean zehar", adierazi du Domínguezek.

Zinemaldiko pelikuletarako sarrera bikoitzak, Mugi txarteletako saldo-kargak eta beste sari batzuez gain, escape roomak ezusteko gehiago ekarriko ditu, besteak beste, parte hartzera animatzen direnentzako zozketa bat sare sozialetan (azken unera arte ez da emango horren sariaren berri).

Mugikortasun jasangarria, konpromiso partekatua

GGLAren tarifa-sistema bateratuak txartel bakar batekin bidaiatzeko aukera ematen du Gipuzkoako garraio publiko guztietan: Donostiako autobusak (dBus), GGLAri atxikitako lurraldeko gainerako hiri-autobusak, hiriarteko autobusak (Lurraldebus), metroa (Euskotren) eta aldiriko trenak (Renfe). Doako ontzi-aldaketak, deskontuak eta hobariak eskaintzen ditu, garraio publiko irisgarriagoa, merkeagoa eta efikazagoa ahalbidetze aldera.

Mugikortasun, Turismo eta Lurralde Antolaketako diputatu eta GGLAko presidente Azahara Domínguezek azpimarratu duenez, "Zinemaldiarekin bat gatoz gure egunerokoan sortzen dugun karbono-aztarna murrizteko filosofiarekin, eta uste dugu garraio publikoaren erabilera sustatzea funtsezko neurria dela hori lortzeko. Horregatik, eskerrak ematen dizkiogu arlo honetan izan duten inplikazioagatik, eta elkarlanean jarraituko dugu Gipuzkoa lurralde jasangarriagoa ez ezik, berdintasun handiagokoa ere izan dadin, inor ez dadin ibilgailu pribatuaren mende egon bere bizitza garatzeko", esan du GGLAko presidenteak.